Скачать с ютуб 1 сентября в МЮГ "Уолан"! в хорошем качестве

1 сентября в МЮГ "Уолан"!

Саҥа 2023-2024 үөрэх дьылын маҥнайгы чуораана чугдаарар Билии күнүнэн бары үөрэнээччилэри, учууталлары, педагогическай үлэ ветераннарын уонна төрөппүттэри итиитик- истиҥник эҕэрдэлиибит! В.В. Алексеев аатынан Тойон Мүрүтээҕи уолаттар гимназияларыгар барыта 183 уолан саҥа үөрэх дьылын саҕалаата. Кинилэр ортолоругар 32 уолаанчык гимназия боруогун саҥа атыллаатылар. 5 "а" кылааска Троева Айыы-Куо Николаевна, 5 "б" кылааска Мигалкина Маргарита Павловна кылаас салайааччыларынан ананан үлэлэрин саҕалаатылар. Билии күнүн үөрүүлээх линейката модун Россия судаарыстыбаннай былааҕын өрө көтөҕүүттэн саҕаланна. Гимназия дириэктэрэ Ф.Ф. Татаринов уоланнарга саҥа үөрэх дьылын соруктарын билиһиннэрдэ, коллективы саҥаттан саҥа ситиһиилэргэ ыҥырда. Уоланнар, учууталлар уонна төрөппүттэр быйыл саҥа үлэтин саҕалыыр математика учуутала Иванна Михайловна Петрованы сылаастык эҕэрдэлии көрүстүлэр. Саҥа бэһис кылаас уолаанчыктара Билии күнүнэн доргуччу хоһоон ааҕан, ньиргиччи ырыа ыллаан эҕэрдэлээтилэр. 31 быйылгы выпускник аатыттан үөрэх туйгуна Айтал Матвеев эҕэрдэ тылы эттэ. Билии күнүн бырааһынньыгын бары кыттыылаахтарыгар анаан "Уус-Алдан улууһа (оройуона)" МТ баһылыгын солбуйааччы Борисов М.В., улуустааҕы үөрэх управлениен социальнай-психологическай киинин салайааччыта Стрекаловская М.М. уонна "Мүрү нэһилиэгэ" МТ депутаттарын Сүбэтин председателэ Федоров О.Ф., улуус прокурора Малинкин А.Л. эҕэрдэ тылларын эттилэр. Улууспут дьаһалтатын аатыттан СӨ үөрэнээччилэрин спортивнай оонньууларыгар 1 миэстэни ылбыт Уус Алдан хамаандатыгар ситиһиилээхтик күрэхтэспит гимназистарга уонна физкультура учуутала Н.П. Готовцевка Махтал сурук, өйдөбүнньүк бэлэх туттарылынна. Саҥа саҕалааһыннар, айымньылаах көрдөөһүннэр уонна арыйыылар бу күнтэн саҕаланнылар. Саҥа үөрэх дьыла көдьүүстээх үлэнэн толору буоллун, үрдүк ситиһиилэри аҕаллын!